پۈتۈن يىللىق يېزا ئىگىلىكىدىن مول ھوسۇل ئېلىش، كىرىمنى ئاشۇرۇشنى تىرىشىپ قولغا كەلتۈرۈش كېرەك

شىنجاڭ بويىچە 2026 - يىللىق ئەتىياز پەسىللىك يېزا ئىگىلىك ئىشلەپچىقىرىش خىزمىتى يىغىنى ئېچىلدى

پۈتۈن يىللىق يېزا ئىگىلىكىدىن مول ھوسۇل ئېلىش، كىرىمنى ئاشۇرۇشنى تىرىشىپ قولغا كەلتۈرۈش كېرەك

شىنجاڭ گېزىتى، قەشقەر، 3 - ئاينىڭ 25 - كۈنى خەۋىرى ئانار بۇلۇت\شىنجاڭ گېزىتى مۇخبىرى ۋاڭ نا خەۋەر قىلىدۇ: 3 - ئاينىڭ 25 - كۈنى، شىنجاڭ بويىچە 2026 - يىللىق ئەتىياز پەسىللىك يېزا ئىگىلىك ئىشلەپچىقىرىش خىزمىتى يىغىنى قەشقەر شەھىرىدە ئېچىلدى. ئاپتونوم رايونلۇق پارتىيە كومىتېتىنىڭ مۇئاۋىن شۇجىسى چېن مىڭگو يىغىنغا قاتناشتى ھەم سۆز قىلدى.

يىغىندا مەملىكەت بويىچە ئەلا سۈپەتلىك دېھقانچىلىق، چارۋىچىلىق مەھسۇلاتلىرى مۇھىم تەمىنات بازىسى بەرپا قىلىش ئىستراتېگىيەلىك ئورۇن بېكىتمىسى نىشانلىنىپ، شىنجاڭنىڭ ھازىرقى يېزا ئىگىلىك ئىشلەپچىقىرىش ۋەزىيىتى تەھلىل قىلىنىپ، ھەرقايسى جايلارنىڭ تەجرىبە، ئۇسۇللىرى يەكۈنلىنىپ ۋە ئالماشتۇرۇلۇپ، ئەتىيازلىق يېزا ئىگىلىك ئىشلەپچىقىرىشى ۋە يېزا ئىگىلىكى، يېزا، دېھقانلارغا دائىر نۇقتىلىق خىزمەتلەر ئورۇنلاشتۇرما قىلىندى.

يىغىندا مۇنداق تەكىتلەندى: باش شۇجى شى جىنپىڭنىڭ يېزا ئىگىلىكى، يېزا، دېھقانلار خىزمىتى توغرىسىدىكى مۇھىم بايانلىرى ۋە مۇھىم يوليورۇقىنىڭ روھىنى چوڭقۇر ئۆگىنىپ، ئىزچىللاشتۇرۇپ، «ئىككىنى تىكلەش»نىڭ ھەل قىلغۇچ ئەھمىيىتىنى چوڭقۇر ئۆزلەشتۈرۈپ، «ئىككىنى قوغداش»نى قەتئىي ئىشقا ئاشۇرۇپ، ئۆگىنىش، پىكىر يۈرگۈزۈش، ئەمەلدە كۆرسىتىش، ئۆزلەشتۈرۈش جەريانىدا ئۈزلۈكسىز ھالدا يۆنىلىشنى ئايدىڭلاشتۇرۇش، تەدبىر بەلگىلەش، چارە تېپىش كېرەك. سىياسىي ۋە ئومۇملۇق يۈكسەكلىكىدە تۇرۇپ، يېزا ئىگىلىك ئىشلەپچىقىرىشىدا دۇچ كەلگەن ۋەزىيەت ۋە پايدىلىق ئامىللارنى ئىلمىي تەھلىل قىلىپ ۋە دەل جايىدا ئىگىلەپ، خىزمەتنىڭ مۇھىم نۇقتىسى ۋە ئاساسلىق زېھىننى ئەتىيازلىق يېزا ئىگىلىك ئىشلەپچىقىرىشىنى چىڭ تۇتۇشقا مەركەزلەشتۈرۈپ، «دائىم غېمىدە بولۇش» مەسئۇلىيەت تۇيغۇسى ۋە «دېھقانچىلىق ۋاقتى ساقلاپ تۇرمايدۇ» دەيدىغان تەخىرسىزلىك تۇيغۇسى بىلەن تۈگۈننى تۈگۈنگە ئۇلاپ تۇتۇش، ئۆتكەللەردىن ئارقا - ئارقىدىن ئۆتۈشنى پۈتۈن يىلدا يېزا ئىگىلىكىدىن مول ھوسۇل ئېلىشقىچە داۋاملاشتۇرۇش كېرەك.

يىغىندا مۇنداق تەلەپ قىلىندى: دېھقانچىلىق ۋاقتىنى قولدىن بەرمەي ئەتىيازلىق پەرۋىش، ئەتىيازلىق تېرىلغۇنى ئىنچىكە، ياخشى ئىشلەپ، ئەتىيازلىق يېزا ئىگىلىك ئىشلەپچىقىرىشىدىكى تەشەببۇسكارلىق جېڭىنى قەتئىي ياخشى قىلىپ، ئەتىيازلىق يېزا ئىگىلىك ئىشلەپچىقىرىشىدىكى تۈرلۈك خىزمەتلەرنى تېز، بالدۇر تۇتۇپ ئالغا سىلجىتىش كېرەك. ئاشلىق، ياغ ئىشلەپچىقىرىش نىشان - ۋەزىپىسىنى كەم - كوتسىز ئەمەلىيلەشتۈرۈپ، ئەتىيازلىق ئېتىز پەرۋىشىنى ياخشى تۇتۇپ، ئەتىيازلىق سۇغىرىش، سۇ بىلەن تەمىنلەش خىزمىتىنى ئالدىن پىلانلاپ ياخشى ئىشلەش، ئەتىيازلىق تېرىلغۇغا تەييارلىق قىلىش مۇلازىمىتىنى سان - سۈپەتكە كاپالەتلىك قىلغان ھالدا ياخشى ئىشلەش، يېزا ئىگىلىكىدە ئاپەتتىن مۇداپىئەلىنىش، ئاپەتنى ئازايتىش، ئاپەتتىن قۇتقۇزۇش خىزمىتىنى ياخشى ئىشلەش كېرەك. كۈچنى مەركەزلەشتۈرۈپ يېزا ئىگىلىكىنىڭ يۇقىرى سۈپەتلىك تەرەققىيات قاتتىق ۋەزىپىسىنى ئەمەلىيلەشتۈرۈپ، يىللىق يېزا ئىگىلىك ئىشلەپچىقىرىش نىشانىنى ئومۇميۈزلۈك تاماملاپ، مەۋقەنى دۆلەتنىڭ ئېھتىياجى، شىنجاڭنىڭ ئىقتىدارىغا قويۇپ، ئاشلىقنى مۇقىملاشتۇرۇش، كېۋەز سورتىنى ياخشىلاش، باغۋەنچىلىكنى كۈچەيتىش، چارۋىچىلىقنى گۈللەندۈرۈش، خاس كەسىپلەرنى ئىلگىرى سۈرۈشتە چىڭ تۇرۇپ، دۆلەت ئىستراتېگىيەسىگە تېخىمۇ ياخشى مۇلازىمەت قىلىش كېرەك. يۇقىرى ئۆلچەملىك ئېتىز قۇرۇلۇشىنى يۇقىرى سۈپەتلىك ئالغا سىلجىتىپ، يېزا ئىگىلىك مەھسۇلاتلىرىنى پىششىقلاش كەسىپ زەنجىرىنى ئۇزارتىش، تولۇقلاش، كۈچەيتىشنى زور كۈچ بىلەن ئالغا سىلجىتىپ، 2 - نۆۋەتلىك يەر ھۆددىگەرلىك مۇددىتى توشقاندىن كېيىن يەنە 30 يىل ئۇزارتىشنى پۈتۈن رايون بويىچە نۇقتىدا سىناق قىلىشنى پۇختا، ياخشى ئىشلەش كېرەك.

يىغىندا مۇنداق تەكىتلەندى: توغرا سىياسىي نەتىجە قارىشى تۇرغۇزۇش ۋە ئەمەلدە كۆرسىتىش ئۆگىنىش - تەربىيەسىنى پۇختا قانات يايدۇرۇپ، يېزا كوللېكتىپىنىڭ «ئۈچ مۈلۈك»ىنى باشقۇرۇش، يۇقىرى ئۆلچەملىك ئېتىز قۇرۇلۇشىدىكى گەۋدىلىك مەسىلىلەرنى مەركەزلىك تۈزەشنى سىجىل چوڭقۇرلاشتۇرۇپ، ھايۋانات زور يۇقۇمىنىڭ ئالدىنى ئېلىش ۋە ئۇنى تىزگىنلەش خىزمىتىنى پۇختا، ياخشى ئىشلەپ، نىشاننى چىڭ كۆزلەپ، ئەمەلىي ئىشلەپ ئىلگىرىلەپ، پۈتۈن يىلدا يېزا ئىگىلىكىدىن مول ھوسۇل ئېلىش، كىرىمنى ئاشۇرۇشنى تىرىشىپ قولغا كەلتۈرۈپ، يېزا ئىگىلىكى كۈچلۈك رايونى قۇرۇلۇشىدا ئۈزلۈكسىز يېڭى ۋەزىيەت يارىتىشنى ئالغا سىلجىتىپ، شىنجاڭنىڭ ئىقتىساد، جەمئىيىتىنىڭ يۇقىرى سۈپەتلىك تەرەققىياتىنى كۈچلۈك ئاساسىي تىرەك بىلەن تەمىنلەش كېرەك.

يىغىندا قەشقەر ۋىلايىتى، بىڭتۇەن ساۋخۇ تۈر رايونى، بورتالا موڭغۇل ئاپتونوم ئوبلاستى، ئاقسۇ ۋىلايىتى، خوتەن ۋىلايىتىدىكى مەسئۇل يولداشلار پىكىر ئالماشتۇرۇپ سۆز قىلدى. يىغىندىن ئىلگىرى، يىغىنغا قاتناشقۇچىلار يېڭىشەھەر ناھىيەسى، كوناشەھەر ناھىيەسى، قەشقەر شەھىرى ۋە بىڭتۇەن ساۋخۇ تۈر رايونىدىكى بەش يېزا ئىگىلىك ئىشلەپچىقىرىش نەق مەيدانىنى كۆزدىن كەچۈردى.

مۇقىيات جارمۇقامەت، نيې جۇاڭ، ۋەن پىڭ يىغىنغا قاتناشتى.

بۇ مەزمۇن يارىغان بولسا، كۆپلەپ تارقىتىپ قويغايسىز